By JOENALD MEDINA RAYOS
LIAN, Batangas – NANINIWALA si Senador Cynthia Villar na kailangang magkatuwang na palakasin pa ng pamahalaan at ng pribadong sektor ang mga programa nito upang isulong ang seguridad sa pagkain sa bansa.
Sa kaniyang pagbisita sa isang DV Boer Farm sa bayang ito, Lunes ng umaga, sinabi ng senadora na malaki ang makakawa ng pakikipagtuwang ng pribadong sector sa pamahalaan upang matiyak na may sapat na suplay ng pagkain ang sambayanang Pilipino sa hinaharap.
Anang senador, ayon sa ulat ng Food and Agriculture Organization (FAO) nahaharap sa malaking krisis o kakulangan sa pagkain sa buong mundo ilang dekada mula ngayon, kaya bago pa man dumating ang kakulangang ito, mas makabubuting seryosong paghandaan ito habang maaga pa.
Kinilala naman ng mambabatas ang ginagawa ng naturang farm sa paghikayat nito sa iba pang magsasaka na makipagbalikatan para sa seguridad sa suplay ng pagkain. “Tayo ay tumatanda na at maaaring hindi na natin abutin ang krisis na iyon, ngunit ang ating mga anak at mga apo ang maaaring magdanas ng kakulangang iyon kung hindi natin ito mapaghahandaan ng maayos ngayon,” pahayag pa ng senadora.
Si Villa rang anging panauhing tagapagsalita sa 1st Paiwi partners convention at paglulunsad ng Magkakasama sa Sakahan (Magsasaka), Inc. na isang samahan ng mga magsasaka o kaya ay mga karaniwang indibidwal na walang kakayahang mamuhunan ng malaking negosyo ngunit handang makibahagi sa programa sa pagtiyak ng saganang pagkain sa pamamagitan ng paglalagay ng puhunan o ambag sa programa.
Paliwanag ni DV Boer Farm president Dex Villamin, Jr., kahit ordinaryong mamamayan na walang kakayahang mamuhunan ng malaki ay maaaring mag-ambag o maglagak ng maliliit na puhunan sa pamamagitan ng pagbili ng isa o higit pang bilang ng hayop na ipaiiwi mismo sa farm upang doon na rin alagaan.
May sariling talipapa rin ang farm kung saan mabibili ang mura at de kalidad na karne ng baka, baboy, kambing, tupa, manok, pugo, pabo at iba pa.|#BALIKAS_News
