By JOENALD MEDINA RAYOS
LUNSOD NG TANAUAN, Batangas – HINDI na matutupad ang mga pangarap ng isang 15-anyos na estudyante na makatapos man lang ng pag-aaral matapos mabigong maisalba ang buhay bunsod ng pagkalunod sa isang pool sa bayang ito nitong Miyerkules, Mayo 30.
Kinilala ng otoridad ang biktimang si Jayron Bernados y Recta, estudyante, tubo at residente ng Brgy. San Antonio, Sto. Tomas, Batangas.
Batay sa paunang imbestigasyon ng pulisya, bandang alas-8:00 ng umaga nong Miyerkules, nagtungo umano ang may 13 kabataan Sunshine Garden Resort na pag-aari ng isang Raul Mabansag y Udico sa Brgy. Darasa, lunsod na ito para sa isang group summer getaway.
Nang humigit-kumulang ay alas-9:00 ng umaga, habang nagliliguan na ang grupo, nagpadausdos umano ang biktima sa slide ng resort at bumagsak sa may 6-talampakang lalim ng tubig.
Dahil sa hindi kagalingang lumangoy ang biktima, hindi niya kinaya ang malamim na tubig at nagsimula na siyang malunod.
Kaagad namang sumaklolo ang nakatalagang lifeguard ng resort na nakilalang si Gerald Bendo y Britanya at sinikap sagipin ang biktima at iahon ito sa tubig saka kaagad na isinugod sa Daniel Mercado Medical Center. Nabigo namang maisalba ang biktima at ideneklarang patay na ni Dr. Roner Michael C. Mateo, attending physician.
Panawagan naman ng otoridad sa publiko, na bantayan ang mga kabataang kadalasan ay nagsisitakas pa sa kabatiran ng mga magulang o kasamahang nakatatanda para lamang makasama sa mga swimming party na kadalasan din ay nauuwi sa sakuna.|#BALIKAS_News
