Nagsimula na ang pagpapatupad ng 100% deployment ng mga traffic enforcers at empleyado ng Transportation Development and Regulatory Office (TDRO) noong April 3 kaugnay ng Ligtas SUMVAC (Summer Vacation) at bilang paghahanda sa inaasahang pagdagsa ng mga tao sa paggunita ng Semana Santa.
May 188 na personnel ng TDRO ang nakatalaga sa traffic management at monitoring ngayong Lenten season.
Ayon kay Traffic Operations Supervisor, Cris Mark Banaag, 24/7 bukas ang kanilang command center upang masiguro ang kaligtasan ng mga deboto na bibisita sa lungsod.
“Naglagay kami ng satellite command posts sa mga strategic na lugar gaya ng Monte Maria, Balagtas, Sta. Clara, Bolbok at Batangas City Grand Terminal kung saan may mga help desk upang tumugon sa mga nangangailangan ng tulong,” sabi ni Banaag.
Idinagdag pa niya na may daytime truckban mula sa Libjo hanggang Talahib Pandayan ang ipinatupad noong April 3 upang maibsan ang mga sasakyan na pupunta sa mga nasasakupang lugar.
Ito ay mula 6AM hanggang 9AM at tatagal hanggang April 9.
Nagsagawa din ng clearing operations sa mga national highways kasabay ng pamimigay ng mga road safety tips flyers sa mga driver at mananakay bilang pagpapaigting ng kampanya ng tanggapan hinggil sa kahalagahan ng safety driving.
May itinalaga ring 24 hour- police assistance desks (PADs) ang Batangas City Police Station sa mga simbahan, terminal, pangunahing lansangan, commercial areas at tourist spots sa lungsod.
Inihayag naman ni City Disaster Risk Reduction Management (CDRRM) Officer, Rodrigo Dela Roca na naka-red alert ang operation center ng kanilang tanggapan hanggang sa matapos ang Ligtas SUMVAC.
Idinagdag din niya na kasama sa pagsasagawa ng Ligtas Sumvac ang on-going relief operations sa nangyaring oil spill sa Mindoro na umabot sa katubigan ng Isla Verde.
Aniya, hindi dapat magpanic ang mga tao at bukas ang Isla Verde sa mga turistang gustong bumisita dito.
“Ayon sa resulta ng water sampling, ligtas, walang kontaminasyon o anumang masamang epekto ang oil slick na umabot sa Isla Verde at sa iba pang katubigamg nasasakop ng lungsod kung kayat maaaring mangisda, mag-swimming, diving, snorkeling at magsagawa ng iba pang water activities na hindi nakukumpurmiso ang kaligtasan,” dagdag pa ni Dela Roca.
Nakatakdang ilift ang red alert status sa April 9 kasabay ng Linggo ng Pagkabuhay.| PIO Batangas City
