By JOENALD MEDINA RAYOS
NASUGBU, Batangas — HINDI hadlang ang umiiral na pandemya hatid ng corona virus disease 2019 (CoVid-19) para magtuluy-tuloy ang National Greening Program ng (NGP) ng pamahalaan at ang aktibong pakikiisa ng pribadong sektor para ito’y magtagumpay.
Ito ang pinatunayan ng mga volunteers mula sa pampubliko at pribado sektor na nakiisa sa isang malawakang pagtatanim ng bakawan sa bayang ito kamakailan.
Pinangunahan ng mismo ni DENR CALABARZON Regional Executive Director Nonito M. Tamayo at ng mga kawani ng CENRO Calaca at local government unit (LGU) ng Brgy. Onse, Nasugbu, Batangas mula sa pampublikong sektor, samantalang aktibo ring nakipagtuwang ang mga kawani ng kumpanyang ZAMA Precision Industry Manufacturing Philip-pines Inc. mula sa pribadong sektor.
Ilan pa sa mga kalahok sa nasabing aktibidad ay ang OIC- CENRO Calaca, Isagani Amatorio; Mayor ng Nasugbu, Antonio Barcelon; MENRO Nasugbu Francisco Amuyo, Kapitan ng Brgy Onse, Yolanda Macapagal; at Ronald Wienholts na bise-presidente ng ZAMA.
Ang aktibidad na ito ay kasama sa kasunduang ginanap noong ika-5 ng Pebrero sa pagitan ng DENR at ng ZAMA sa ilalim ng programang National Greening Program at platapormang “Tayo ang Kalikasan” kung saan ang nasabing kumpanya ay naglalayong mataniman ang limang (5) ektaryang graduated mangrove NGP site sa Nasugbu.
Nasa 2,500 na punla ng Bakawan lalake (Rhizophora apiculata), Bakawan Babae (Rhizophora mucronata) at Bakawan bato (Rhizophora stylosa) ang naitanim sa nasabing aktibidad.
Ang DENR ay patuloy na nanghihikayat sa iba’t ibang mga grupo at indibidwal na makiisa sa pagprotekta at pangangalaga ng kalikasan sa pamamagitan ng pakikipag-ugnayan at paglahok sa mga aktibidad pangkalikasan.
Bukod sa malaking tulong ito sa pagpapanumbalik ng balanseng kalikasan, malaki ring tulong ito sa industriya ng eko-turismo.
May mga mangrove forests sites sa mga bayan ng San Juan, Lobo, Calatagan, at Lungsod ng Batangas.|-BNN
