LEMERY, Batangas – HINDI na kinaya ng isang ginang sa Barangay Palanas, bayang ito, ang maya’t mayang paglindol bunsod ng pag-aaburuto ng Bulkang Taal, na nagdulot naman ng kaniyang pagkamatay nitong nagdaang Martes, Enero 14.
Sa social media post ng kaniyang manugang na si Nerissa Bangcoro Matanguihan, isang guro, hindi na nagawang lumikas ng kaniyang biyenan, at suspetsa ng kaniyang pamilya na kinapitan ito ng nerbiyos sa madalas na pag-lindol simula pa noong Linggo, Enero 12.
Taliwas ito sa mga kumakalat na posts sa social media na namatay ang naturang ginang ng dahil sa pagkain ng tilapia na hinuli sa Ilog Pansipit.
Matapos namang ipag-utos ang mandatory evacuation kasunod ng pag-locked down sa bayan ng Lemery, kasamang nag-evacuate sa Lungsod ng Lipa ang burol ng sinawimpalad na residente.|- BALIKAS News Network
