TANAUAN CITY, Batangas – TINIYAK ni Mayor Sweet Halili ng lungsod na ito na makauuwi nang maayos ang mga mag-aaral na nakapasok pa rin sa kabila ng kanselasyon ng klase dahil sa masamang panahon bunsod ng bagyong #FalconPH, dahilan upang pangunahan niya mismo ang paghahakot sa mga batang ito pauwi.
Dahil may mga batang malalayo ang kanilang tahanan sa mga paaralan, maaga pa silang pumasok Miyerkules ng umaga bago pa nila nalaman ang pag-aanunsyo ng kanselasyon ng klase.
Si Mayor Angeline “Sweet” Halili ang nanguna sa pagsasagawa ng Oplan Hakot Estudyante kung kaya’t pinuntahan ng alkalde kasama ang ilang kawani ng city hall ang mga eskwelahan upang sunduin ang mga nasabing mag-aaral at ihatid sila sa kanilang mga tahanan.
Mismong si Mayor Halili pa ang nagmaneho sa isang van na ginamit sa nasabing operasyon na lubos namang ikinatuwa ng mga estudyante.|Joenald Medina Rayos
