PADRE GARCIA, Batangas – BINIGYANG-pagkilala kamakailan ng Pamahalaang Panlalawigan ng Batangas, sa pangunguna ng Provincial Agriculture Office, ang dalawang miyembro ng Batangas Province Delegation na dumalo sa Regional 4-H (Head, Heart, Hands, and Health) Club – CALABARZON para sa kanilang karangalang nakamit na nagpatunay sa angking galing ng mga Batangueño.
Ang ibinigay na parangal ay kaugnay ng isinagawang 5th Regional Farm Youth Camp, na may temang “More Fun and Income for Farm Youth Through Farm Tourism,” na ginanap noong nakalipas na buwan sa sa Virgilio Melendez Memorial Elementary School Barangay Tacungan, Pililia, Rizal.
Nahirang si John Zedric B. Barawidan, 18 taong gulang, mula sa 4-H Club ng Quilo-Quilo South, Padre Garcia, Batangas na kampyon sa Extemporaneous Speech Competition sa nasabing pagtitipon.
Samantala, ang kanyang kapwa Gracianos na si Marwin M. De Torres, 24 na taong gulang, ay nahalal naman bilang Regional 4-H Club Federation President (Calabarzon). Mismong si Gobernador Dodo Mandanas, kasama ang mga miyembro ng Sangguniang Panlalawigan, ang nag-abot ng Certificates of Recognition kina Barawidan at De Torres. | Derick Ilagan
