By JOENALD MEDINA RAYOS
KAPITOLYO, Lunsod Batangas – TULUYAN nang bumaba sa puwesto nitong Lunes, Abril 16, bilang pangulo ng Philippine Councilors’ League (PCL) – Batangas Chapter si Bokal Mildred B. Sanchez, kagawad ng Sangguniang Bayan ng Nasugbu.
Sa kaniyang pananalita sa regular na sesyon ng Sanggunaing Panlalawigan noong Lunes, isinapubliko ni Sanchez ang kaniyang pamamaalam sa konseho at pinasalamatan ng lubos ang mga kasapi ng Sanggunian na aniya’y nagging napakabait sa kaniya sa may 21 buwan niyang paglilingod bilang kinatawan ng mga pambayan at panlunsod na kagawad sa konseho.
Nauna rito, nagsumite ng kaniyang resignation letter si Sanchez kay Bise Gobernador Sofronio Ona, Jr. bilang pinuno ng Sangguniang Panlalawigan noong Pebrero 13, Biyernes at pinadalahang-sipi si Gobernador Hermilando I. Mandanas. Pinadalahan din niya ng katulad na resignation letter ang Department of Interior and Local Government (DILG)-Batangas Provincial Office noong Pebrero 28.
Samantala, inindorso naman ni Sanchez sa Sangguniang Panlalawigan at hiningi ang maayos na pagtanggap kay Kagawad Leo Malinay ng bayan ng Lian na siyang umakyat sa Pagka-Pangulo ng liga ng mga kagawad at siyang magiging ex-officio member ng Sangguniang Panlalawigan.|#BALIKAS_News
